అహోబిల క్షేత్ర మహత్మ్యము

నారాయణం నమస్కృత్య - నరంచైవ నరోత్తమం |
దేవీం సరస్వతీం వ్యాసం - తతో జయముదీరయేత్ |

క్షీరసాగర శయనుడైన దేవాదిదేవుడు నారాయణునకు, నరోత్తముడైన నరునకు (నరనారాయణులు బదరీవనములో తపస్సు చేసిన మహర్షులు - అలాంటి పరమ ఋషులకు) సకల వాక్ స్వరూపిణి అయిన సరస్వతీదేవికి నమస్కరించి, వేదములను విభజించియు, పదునెనిమిది పురాణములు రచించియు, ప్రసిద్ధిగనిన వేదవ్యాస మహర్షి అనంతరము 'జయ' నామక మహాభారతమును రచించెను. (జయమును శుభమును కలిగించు పురాణములను చెప్పెను.)

ప్రణమ్య పరమాత్మానం - పరమానంద కారణం |
ప్రవక్ష్యామి యధాపూర్వం - మహాత్మ్యం హయమేధసః॥

సకల జీవులకు కూడ పరమానందము కలిగించగల పరదైవమెవరో ఆ పరమాత్మునకు నమస్కరించి, ఇంతకుముందు పురాణగాధలన్నీ చెప్పిన రీతిగానే, శ్రీమదహోబిల నరసింహ స్వామి యొక్క (ఆ స్వామి వేంచేసియున్న క్షేత్రము యొక్క - అని కూడ) మహాత్యమును చెప్పెదను.

(హయమేధసుడు - విష్ణువు : ఇక్కడ నృసింహస్వామి)
పురాతు జాహ్నవీతీరే - మునయశ్శానకాదయః॥
కృతాత్మానః పరప్రీత్యా - పప్రచ్చున్నారదం మునిం ॥

పూర్వము గంగానదీ తీరంలో శౌనకాది మహామునులు పరమానందభరితులై దేవముని అయిన నారదమహా ఋషితో ఇట్లన్నారు...................