తత్త్వ శాస్త్రం అంటే ఏమిటి? What is Philosophy?
తత్త్వశాస్త్రాన్ని ఇంగ్లీష్లో "ఫిలాసఫీ" అంటారు. అది గ్రీక్ పదం. “జ్ఞాన పిపాస” (Love of Wisdom) అని అర్ధం. ఈ పదాన్ని పరిచయం చేసినవాడు గ్రీకు తత్త్వవేత్త పైథాగరస్. తత్త్వశాస్త్రం బానిసయుగంలో పుట్టింది. ఆనాటి విజ్ఞాన శాస్త్రం మొలకెత్తిన విత్తనంలా ప్రాధమికదశలో ఉండేది. ఒకే వ్యక్తి అన్నివిజ్ఞాన విషయాలను అధ్యయనం చేయగలిగేవాడు. ఆకళింపు జేసుకోగలిగేవాడు. అతడిని "తత్త్వవేత్త” అనేవారు. ప్రాచీన కాలం విజ్ఞానమంతటిని తత్త్వశాస్త్రం అని పిలిచేవారు. న్యూటన్ ఫిజిక్స్, లిన్నేయస్ బోటనీ, లామార్క్ జువాలజీ గ్రంధాలు కూడా ఫిలాసఫీ (Natural Philosophy) పేరు మీద ఉండేవి. ఏ శాస్త్రంలోనైనా ఉన్నత ప్రమాణం సాధిస్తే ఇప్పటికీ మన యూనివర్సిటీలు "డాక్టర్ అఫ్ ఫిలాసఫీ" (PhD) ప్రదానం చేస్తున్నాయి.
ఫిలాసఫీ స్థానే “సైన్సు” అనే పదం 19వ శతాబ్దంలోనే వాడుకలోకి వచ్చింది. ఇది ఫ్రెంచి, ఇంగ్లీష్ భాషలకు చెందినది. దీని మూలం లాటిన్ పదం “సైంటియా” (Sciantia). ఆధునిక కాలంలో విజ్ఞానం వికసించిన కొలదీ సౌలభ్యం కోసం సైన్సు శాఖోపశాఖలుగా చీలింది. ప్రకృతి, సామాజిక శాస్త్రాలుగా విడిపోయింది. కాలగమనంలో ఇవి ఖగోళం, గణితం, ఫిజిక్స్, కెమిస్ట్రీ, చరిత్ర, భౌగోళికం, ఆర్ధిక, రాజకీయ శాస్త్రాలుగా అభివృద్ధి చెందాయి.
ఒక శాస్త్రానికి ఒక పరిధి వుంటుంది. ప్రకృతి, సమాజంలోని ఏదో ఒక విభాగంతో విజ్ఞానశాస్త్రం ముడిపడి వుంటుంది. నక్షత్రాలు, గ్రహాలు గురించి ఖగోళ శాస్త్రము, జీవుల గురించి జీవశాస్త్రము, సమాజం గురించి సామాజిక శాస్త్రము ప్రత్యేకంగా అధ్యయనం చేస్తాయి. మరి తత్త్వశాస్త్రం దేని గురించి చెబుతుంది? ఏయే అంశాలను విశదీకరిస్తుంది?
తత్త్వశాస్త్రం మనకు కొత్త గాదు. ప్రతి ఒక్కరిలోనూ తాత్త్విక ఆలోచన వుంది. వైద్యం తెలియనివాడు, సంగీతం రానివాడు లేడంటారు. అలాగే తాత్త్విక ఆలోచన లేనివాడు లేడంటే తప్పుగాదేమో! నేనెవర్ని? నా చుట్టూ వున్న ఈ ప్రపంచం ఏమిటి? అనే ప్రశ్న ఎప్పుడోసారి ఎవరికైనా తడుతుంది. జవాబు శాస్త్రీయం కావచ్చు. అశాస్త్రీయం కావచ్చు. అది ఒక ప్రాపంచిక దృక్పథాన్ని తెలియజేస్తుంది. అదే తత్త్వశాస్త్రం. అందులో సైన్సు వుంది. అధ్యాత్మికత వుంది. సైన్సు భౌతిక ప్రపంచానికి చెందినది. రుజువును కోరుతుంది. ఇంద్రియానుభూతి, హేతుబద్ధత కొలమానంగా........................
