"నాలుగయిదు పేజీల చిన్న కథలు కొన్ని . పదిహేను పేజీల పెద్ద కథలు మరికొన్ని. నిడివి సంగతి ఎలా ఉన్న కథాల్లోని అంతః సూత్రం - జీవితం.

                     సుదూరపు కెనడా నుంచి పక్కనే వున్న నేపాల్ వరకు ఆయా జీవితాలను, జనజీవన సరళిని తెలుగు పాఠకుల దగ్గరకు చేర్చే పధ్నాలుగు కథలు. నూట ఏభై ఏళ్ళనాటి అమెరికా అంతర్యుద్ధం నుంచి వర్తమాన కాలపు కజకిస్థాన్ బాషా సమస్య దాకా చరిత్రకు, సంస్కృతికి వారధిలా నిలచే కథలు.

                     సగానికి పైగా కథల్లో యుద్ధం, హింస, రక్తం కథా వస్తువు. కనీసం నేపధ్యం. యుద్ధ నేపధ్యమే అయినా కథల్లో కనిపించేది అచ్చమైన జీవితం అన్న స్ఫురణమనకు కలుగుతుంది. ఆ తుపాకీ మొనలపైనే గడ్డిపూలు పూయడం " లాంటి మానవత్వపు పరిమళం కథల్లో కనిపించి సంతోషపరుస్తుంది. ప్రపంచం మీద, భవిష్యత్తు మీద నమ్మకం కలిగిస్తుంది.