సంక్రాంతి

'సంక్రాంతి'... అదో మధుర భావనా క్రాంతి

చలి మెత్తని పొత్తిళ్ళలో

నులివెచ్చని కలల కౌగిలింత,

 

అలసట చెందిన హృదయాలకు

సుందర మందహాస కిరణాలు పౌష్యపలకరింత

శ్రమ జీవన వాకిలిలో నూతనోత్సాహాల పులకరింత

అంబరాల సోయగాల - సంబరాల కేరింత

తెలతెల్లవారు సమయాన

తుషారాల తుళ్ళింతల మాటున

తెలిమంచు ముసుగులో

బసవన్నల మంగళ ధ్వనితో

రంగవల్లుల సింగారాల నడుమ

ముచ్చట గొలిపే గొబ్బెమ్మల

కన్నుల పండుగగా అలంకరిస్తూ

కరుణార్ద్రత నిండిన కళ్ళతో

తదేకంగా నావైపు చూస్తూ

నవ్వుతుంది, నవ్విస్తుంది...మళ్ళీ... మళ్ళీ

 

ఆ చల్లని చూపుల్లో, వెన్నెల నవ్వుల్లో

ఎంతటి అనురాగమో, ఎంతటి అభిమానమో

అందుకుని పొందిన ఆనంద పారవశ్యాన్ని

నా కళ్ళలో చూసి ఉప్పొంగిపోతుంది.................................