విప్లవాలకు ముందు రష్యా చైనా దేశాల్లో వచ్చినంత గొప్ప సాహిత్యం ఇవ్వాళ ఆఫ్రికా, లాటిన్ అమెరికా ఖండాల్లో వస్తున్నది. నవల, కవిత్వం, కథలలో మాత్రమే కాదు ఆ సృజనాత్మక ప్రక్రియలకు దిశనూ, ప్రాపంచిక దృక్పథాన్నీ కూర్చే సాహిత్య వివేచన, విమర్శ, తాత్విక చింతనలో కూడా ఇవ్వాళ ఈ ఖండాల రచయితలు , పీడిత జాతులకు కండబలాన్ని కూర్చే అండగా ఉన్నారు. ఇంగ్లిష్ భాషను 'విప్లవీకరించిన' ఘనత కూడ ఇవ్వాళ లాటిన్ అమెరికా పత్రికా రచయితలకు, ఆఫ్రికా సాహిత్యవేత్తలకు దక్కుతుంది. 

              రెండవ ప్రపంచ యుద్ధం తర్వాత దాదాపు ఈ అన్ని దేశాలూ వలస పాలన నుంచి విముక్తి చెందినప్పటికీ విదేశీ పాలనను మరపించే స్వదేశీ దళారీ నిరంకుశ పాలనకు గురికావడం, సామాజిక జీవితంలో కొనసాగుతున్న అసమానత, దోపిడీలు సాహిత్యాన్ని సజీవం చేస్తున్న 'సంఘర్షణకు' కారణమయి ఉంటాయి. 

                                                                                      - గుగి వా థియాంగో, వరవరావు