రాజా రామదాసుగారి బంగళా ముంగిట ఉదయసూర్యుని బంగారు కిరణాలు రంగవల్లులు తీరుస్తున్నాయి. గార్డెన్లో వున్న పచ్చని ఆకులమీద కురిసిన మంచు ముత్యాల్లా మెరుస్తోంది. సూర్యుడికైనా సరే ఆ బంగళా మొత్తం చూడాలంటే తూర్చునించి పడమరకు తిరిగేటంత టైం పడుతుంది. బంగళా ఆవరణలో శ్రీరాముని కోవెలవుంది. పూజారిగారు ఎల్లవేళలా కోవెలనే కనిపెట్టుకుని వుంటూ స్వామివారికి నిత్యం ధూపదీపనైవేద్యాలు సమకూరుస్తుంటారు. శ్రీరామనవమికి స్వామివారికి సర్వాలంకరణ చేసి కల్యాణం జరపటం ఆ యింటి సంప్రదాయం.

రాజా రామదాసుగారు సౌమ్య గంభీరమూర్తి, ఆయన్ని చూస్తే కోపం దూరంగా వెళ్ళి చేతులు కట్టుకుని నుంచుంటుంది. ద్రోహం, మోసం, ఆ ఛాయల్లో తలెత్తుకు తిరగలేవు. రామదాసుగారి ప్రేమాభిమానాలు కూడా ఆయన చేసే దానాల్లాగే గుప్తంగా వుంటాయి. తొంభైతొమ్మిది పెళ్ళిళ్ళు చేయించిన పుణ్యమూర్తి. కలిపురుషుడు నలమహారాజుతో తప్పు చేయించటానికి ఎంత శ్రమపడ్డాడో రామదాసుగారితో తప్పు చేయించటానికి అంతకన్నా ఎన్నోరెట్లు శ్రమపడాలన్నమాట..................................