మేరా జహా

అర్ధరాత్రి వెన్నెలను డేక్షాకెత్తి
నక్షత్రాలను తెంపుకొస్తుంది అమ్మీ

ఈద్ నాడు లేచేసరికి
ఫాతెహా ఇచ్చిన షీర్ ఖుర్మా
కొలువుదీరిన దస్తర్బన్
మాకోసం ఎదురు
చూస్తుంది

నిద్ర దూరమైన అమ్మీకళ్లు
పోటీ పడి ఖాళీ చేసే
మా సేమ్యా కటోరాలను చూసి తృప్తిగా నవ్వుతాయి

అమ్మీ కళ్ళ నుంచి
రాలిన మెత్తని చమ్కీ మెరుపుని తీసి
పాపిట నిండా అలుముకుంటాను.

అమ్మీ తొడిగిన కొత్త దుస్తులతో ఆ రోజు కాలం
ఈద్ మనాయిస్తుంది................