యాత్రా సముద్రం

సంకలనాల గురించి రెండు విషయాలు కూడా చెప్పుకుంటే సరిపోతుంది. సంకలనం అనే తెలుగు పదాన్ని Anthology అనే ఇంగ్లీషు పదాన్నుండి అనువదించుకొన్నాం. 17వ శతాబ్దానికి పూర్వం ఈ పదాన్ని ఎవరూ ప్రయోగించలేదు. నాలుగైదు విషయాల్ని లేదా పదిమంది, రాసిన పాటల్ని, కవితల్ని ఒక పుస్తకంగా ముద్రించి, దానికి పెట్టిన పేరు Miscellany (మిసలేని లేదా మిసలేనియస్). ఇది మనం తెలుగులో వాడుకొన్న 'కలగూర గంప'కి సమానం.

ఇలాంటి 'మిసలేనియస్'ని ఇంగ్లండ్లో మొదటిసారిగా 1557వ సం॥లో ముద్రించారు. అది ఎలిజబెత్ రాణి పాలనాకాలం. రిచర్డ్ టోట్టెల్ అనే వ్యక్తికి ఇలాంటి పుస్తకాల ముద్రణల విషయంలో పేరు వచ్చింది. నిజానికి అతడు చట్టపరమైన, న్యాయ సంబంధిత పుస్తకాలు ముద్రించుకొనేవాడు. క్రమంగా ఈ 'టోట్టెల్ మిసలేని' అనే పుస్తకంలో కవితలు, కథలు, ప్రయాణాలు, హాస్యం, మతం, లాంటి విషయాలను కూడా చొప్పించటంతో ఆ గ్రంథానికి విపరీతమైన అభిమానులు ఏర్పడ్డారు. విలియం షేక్స్పియర్ (1564-1616) కూడా ఈ మిసలేని ద్వారా అనేక విషయాలు తెలుసుకొని తన నాటక రచనలో ఉపయోగించాడని పండితుల అభిప్రాయం.

ఆ తరువాత వంద సంవత్సరాలకి బ్రిటీషువారు Anthology అనే పదాన్ని, రెండు గ్రీకు పదాలను కరిగించి పోతపోశారు. Anthos అంటే పూలు, Logia అంటే సేకరణ.

వివిధ రకాల రంగుల పూలని సేకరించి, మాల అల్లటాన్ని Anthology అన్నారు. ఒక సుగంధ భరితమైన కాంచన మాలని పాఠకుడికి అందించాలి అనేది దీని భావన.

Travail ట్రావెల్ అనే పదాన్ని మొదటగా 14వ శతాబ్దంలో ఉపయోగించారు. హింస పెట్టుట, కష్టపడటం, అనే అర్థంలో వాడబడిన పదం క్రమంగా 'Travel' గా మారింది. ప్రయాణంలో ఎన్నో సాధక బాధకాలు ఉండటం, కఠినమైన మార్గాల్లో ప్రయాణం చెయ్యటం, దొంగల్ని తప్పించుకొంటూ ముందుకి వెళ్ళటం, సౌకర్యాలు లేకపోవటం అనే కష్టాలు ఉన్నాయి కాబట్టి, ట్రావెలర్ వీటినన్నిటిని ఎదుర్కొని సాగిపోవాలి..............................