పద్యాలు పుట్టిన తావులు

పదేళ్ళ కిందట ఉద్యోగంలో భాగంగా అనంతపురం జిల్లాలో పర్యటిస్తున్నప్పుడు, అనుకోకుండా, కటారుపల్లె వెళ్ళాను. అక్కడ వేమనసమాధి చూసినప్పుడు గొప్ప స్ఫూర్తి పొందాను. ఆ తర్వాత, ఏడెనిమిదేళ్ళ కిందట ఒక పుస్తకం చదివాను. బిల్ పోర్టరు అనే అమెరికను యాత్రీకుడు ప్రాచీన చీనాకవుల జ్ఞాపకాల్నీ, స్మారకాల్నీ వెతుక్కుంటూ చీనాలో చేసిన ప్రయాణాల గురించి Finding Them Gone: Visiting China's Poets of the Past (2016) పేరిట రాసిన పుస్తకం. అది చదివాక నాక్కూడా, తెలుగు కవులు పుట్టిన ప్రాంతాల్నీ, తెలుగు పద్యం వికసించిన తావుల్నీ వెతుక్కుంటూ అటువంటి ప్రయాణాలు చేపట్టాలనే కోరిక బలపడింది.

2019 లో తమిళనాడులో విల్లుపురం జిల్లాలో ఎన్నికల పరిశీలకుడిగా బాధ్యతలు నిర్వహిస్తున్నప్పుడు, ప్రాచీన తమిళ కవులు, ముఖ్యంగా నాయన్మార్లు పుట్టిపెరిగిన గ్రామాలు, వారు కవిత్వం చెప్పిన క్షేత్రాలు చూసే అవకాశం కలిగింది. అప్పటి నా పర్యటనల కథనాల్ని ‘పాటలు పుట్టిన తావులు' (2020) పేరిట పుస్తకంగా వెలువరించాను కూడా.

తమిళనాడు వెళ్ళి రాగానే, ఇంకెంతమాత్రం ఆలస్యం చెయ్యకూడదనే ఉద్దేశ్యంతో, పదిహేనుశతాబ్దాలుగా తెలుగు ప్రవహించిన తావుల్లో కొన్నింటిని, తెలుగు పద్యం పుట్టిన కొన్ని తావుల్ని సందర్శించడం మొదలుపెట్టాను. అలా ఆ తావులకు వెళ్ళివచ్చినప్పుడల్లా ఆ అనుభవాల్ని నా బ్లాగు ద్వారా ఎప్పటికప్పుడు మిత్రుల్తో పంచు కుంటూనే ఉన్నాను. బరంపురం నుంచి బళ్ళారిదాకా, వేంగడం నుంచి వేములవాడ దాకా చూసిన కొన్ని ప్రాంతాల్నీ, అలా చూసినచోటల్లా తలుచుకున్న పద్యాల్నీ ఇలా పుస్తకరూపంలో మీ చేతుల్లో పెడుతున్నాను. అయితే ఇందులో అన్నీ యాత్రాకథనాలే కాదు, కొన్ని ప్రాసంగిక వ్యాసాలు కూడా ఉన్నాయి. మొత్తం అరవై వ్యాసాలు.........................